पोक्सो प्रकरणातील अटक तरुणाला जामीन मंजूर
पुणे : पुण्यातील हडपसर परिसरातील अल्पवयीन मुलीवर लैंगिक अत्याचार केल्याच्या गंभीर आरोपाखाली अटक झालेल्या आकाश सिद्धप्पा ढोणे (वय २४ रा. हडपसर) या तरुणाला, अतिरिक्त सत्र न्यायालयाने जामिन मंजूर केला आहे.
पोलिसांच्या माहितीनुसार, आरोपी याने १६ आणि २६ ऑगस्ट २०२४ रोजी अल्पवयीन पीडितेला आपल्या घरी बोलावून तिच्याशी शारीरिक संबंध ठेवले आणि ही बाब कुणालाही सांगितल्यास धमकी दिली. पीडितेने ही घटना आईला सांगितल्यानंतर, तब्बल तीन महिन्यांनी (१६ नोव्हेंबर २०२४) हडपसर पोलिस ठाण्यात गुन्हा दाखल करण्यात आला होता.
गुन्हा भा.न्या.सं. पोक्सो कायद्यांतर्गत गुन्हा दाखल झाल्यानंतर दुसऱ्याच दिवशी म्हणजे १७ नोव्हेंबर २०२४ रोजी पीडितेच्या वैद्यकीय तपासणीत घटनेला दुजोरा मिळाल्याने त्याच दिवशी आरोपीला अटक करण्यात आली होती. आरोपीचे वकिल अॅड. गणेश म्हस्के पाटील यांनी युक्तीवाद करताना सांगितले की, आरोपी निर्दोष असून त्याला खोट्या गुन्ह्यात अडकविण्यात आले आहे. तपास पूर्ण झाला असून चार्जशीट दाखल झाली आहे. आरोपी सात महिन्यांपासून तुरुंगात आहे, त्यामुळे जामीनावर सुटका करावी. तर सरकारी वकील आणि तपासी अधिकाऱ्यांनी जामीनाला तीव्र विरोध केला. त्यांनी सांगितले की, पीडित अल्पवयीन आहे आणि वैद्यकीय पुरावा आरोपांची पुष्टी करतो. आरोपी सुटल्यास तो पीडित व तिच्या कुटुंबियांवर दबाव आणू शकतो. न्यायालयाने निरीक्षण नोंदविले की, गुन्ह्याची तक्रार घटनेनंतर तीन महिन्यांनी दाखल झाली आहे. आरोपी १७ नोव्हेंबर २०२४ पासून तुरुंगात असून तपास पूर्ण झाला आहे. पुढील कोणतीही जप्ती किंवा शोधकार्य बाकी नसल्याने आरोपीला जामिन मंजूर करण्यात येत असल्याचा आदेश अतिरिक्त सत्र न्यायाधीश व्ही. व्ही. नशिककर यांनी पारित केला आहे. आरोपीच्या वतीने अॅड. गणेश म्हस्के पाटील व सहाय्यक म्हणुन अॅड. गुलनाझ पठाण व अॅड. शुभम फडतरे यांनी काम पाहीले.
