घरात घुसून कोयत्याने दहशत माजविणारा जेरबंद
गुन्हे शाखा युनिट-६ च्या पथकाची कारवाई; वाघोलीतील बायफ रोड परिसरातून घेतले ताब्यात
पुणे : इतर साथीदारांच्या संगनमताने घरात घुसून कोयत्याने दहशत माजविणाऱ्या आरोपीला गुन्हे शाखा युनिट सहाच्या पथकाने वाघोली येथील बायफ रोड परिसरात ताब्यात घेऊन जेरबंद केले आहे.
अक्षय महादेव बनसोडे (वय २६ रा. लक्ष्मी नगर, येरवडा, पुणे) असे अटक करण्यात आलेल्या आरोपीचे नाव आहे.
पोलीसांनी दिलेल्या माहितीनुसार दिनांक ८ डिसेंबर रोजी आरोपी व त्याचे इतर साथीदार यांनी संगनमताने कोयते हातात घेऊन फिर्यादीचे घरात घुसून दहशत माजवून मुलगा व पत्नी यांना गंभीर दुखापत करून जखमी केले होते. याप्रकरणी बिबवेवाडी पोलीस स्टेशनमध्ये गुन्हा दाखल करण्यात आला होता. शनिवारी (दि. १४ डिसेंबर) गुन्हे शाखा युनिट-६ चे पथक हद्दीमध्ये गुन्हे प्रतिबंधक गस्त करत असताना रमेश मेमाणे यांना बिबेवाडी पोलीस स्टेशनमध्ये दाखल असलेल्या गंभीर गुन्ह्यातील आरोपी वाघोली येथील बायफ रोड परिसरात आला असल्याची खात्रीशीर माहिती मिळाली. त्यानुसार गुन्हे शाखा युनिट-६ च्या पथकाने सापळा रचून त्याला ताब्यात घेतले. त्याची कसून चौकशी केली असता बिबवेवाडी पोलीस ठाणे येथे दाखल असलेल्या गुन्ह्यातील पाहिजे असलेला आरोपी असल्याचे निष्पन्न झाले. पुढील तपासकामी बिबवेवाडी पोलीस स्टेशनच्या ताब्यात देण्यात आले.
सदरची कामगीरी अप्पर पोलीस आयुक्त (गुन्हे) शैलेश बलकवडे, पोलीस उपआयुक्त (गुन्हे) निखिल पिंगळे, सहा पोलीस आयुक्त (गुन्हे) राजेंद्र मुळीक, युनिट-६ चा अतिरिक्त कार्यभार असलेले पोलीस निरीक्षक युवराज हांडे यांचे मार्गदर्शनाखाली सहा पोलीस निरीक्षक मदन कांबळे, पोलीस उपनिरीक्षक रामकृष्ण दळवी, रमेश मेमाणे, ऋषीकेश ताकवणे, सचिन पवार, गणेश डोंगरे, बाळासाहेब तनपुरे, प्रतिक्षा पानसरे, किर्ती मांदळे यांनी केली आहे.
