चौघांवर दोन वर्षांसाठी तडीपारीची कारवाई
लोणीकंद पोलिसांनी पाठवला होता तडीपारीचा प्रस्ताव
वाघोली : लोणीकंद पोलीस स्टेशनचे हद्दीतील रेकॉर्डवर असणाऱ्या वाघोलीतील तिघे तर लोणीकंद येथील एक अशा चौघांवर परिमंडळ चारचे पोलिस उपायुक्त शशिकांत बोराटे यांनी तडीपारीची कारवाई केली आहे. पोलिस स्टेशनकडून प्राप्त झालेल्या तडीपार प्रस्तावाची चौकशी केल्यानंतर ही कारवाई करण्यात आली आहे. त्यांना पुणे शहर, पिंपरी-चिंचवड पोलिस आयुक्तालय आणि पुणे जिल्हयातून २ वर्षांसाठी तडीपार करण्यात आले आहे.
अजय राजेंद्र माकर, रोहित दत्ता मंजुळे, आकाश राजू दंडगुले, (तिघेही रा. वाघेश्वरनगर, वाघोली) हर्षद कुमार शिंदे (रा. लोणीकंद) यांच्या हालचाली सार्वजनिक शांततेस व सुव्यवस्थेस धोका निर्माण करतील अशा झाल्या होत्या. त्यांच्यावर प्रभावी प्रतिबंधक कारवाई करणे आवश्यक होते. त्यांच्या विरोधात लोणीकंद पोलिसांनी तडीपारीचा प्रस्ताव तयार करून परिमंडळ ४ पोलीस उपायुक्त शशिकांत बोराटे यांच्याकडे पाठविला होता. त्याची चौकशी करून पोलीस उपायुक्त यांनी महाराष्ट्र पोलीस कायदा कलम ५५ अन्वये दिनांक पुणे जिल्ह्यातून दोन वर्षाकरीता हद्दपार केले आहे.
सदराची कामगिरी अपर पोलीस आयुक्त रंजन कुमार शर्मा, सहाय्यक पोलीस आयुक्त संजय पाटील यांचे मार्गदर्शनाखाली लोणीकंद पोलीस स्टेशनचे वरिष्ठ निरीक्षक विश्वजीत काइंगडे, पोलीस निरीक्षक (गुन्हे) मारुती पाटील, पोलीस उपनिरीक्षक सीमा ढाकणे, पोलीस उपनिरीक्षक रामकृष्ण दळवी पोलीस अंमलदार प्रशांत कापुरे, सागर कडू यांनी केली आहे.
